Shqipëria e sloganeve politike



Aurenc Bebja, Klara Buda Post (New York) - France, 23 Tetor 2015

 

Në zgjedhjet parlamentare të 2013 dhe ato lokale të 2015 janë përfshirë 63 parti politike, me apo pa koalicion. Kurioziteti më bëri që të mbledh sloganet e tyre, « ajkën e ajkës », dhe të shoh se çfarë kanë premtuar, propaganduar gjatë fushatave elektorale.

 

Pasi arrita të mbledh pothuajse gjysmat e « parrullave », në pamundësi për ti gjetur të gjitha, vendosa të « vesh » kostumin e një lideri politik shqiptar dhe të luaj rolin e tij. « Kompozova » po me këto slogane një fjalim « prekës dhe bindës » që me siguri në lidhje me « kandidaturën time » do më « sjellë » një numër të konsiderueshëm votash.

 

Me këtë fjalim të « sinqertë » bëhuni gati ti themi « lamtumirë » varfërisë, injorancës, korrupsionit, padrejtësisë e çdo gjëje besdisëse që dëshironi, se këtu do të bëj « premtime të bëra » që as edhe politikanët perëndimorë nuk janë të « aftë » t’i bëjnë.

 

Kuptohet që fjalimin do e mbaj direkt nga tribuna kryesore e sheshit përpara jush, domethënë përpara « qindra-mijëra » mbështetësve euforikë duke më pritur me padurim, me duartrokitje, brohorima dhe me fishkëllima dashamirëse ashtu siç na e ka tradita. Duke marrë parasysh fluksin e madh të simpatizantëve, nuk ju fsheh që jam pak i shqetësuar për faktin se nëse do të ketë vend të mjaftueshëm për të gjithë në shesh.

 

Nëpërmjet « fjalimit tim » të më poshtëm do të gjeni një përmbledhje të 30 sloganeve partiake që kanë për qëllim të « mirën » e Shqipërisë dhe shqiptarëve. Ja se çfarë na është shërbyer nga politika shqiptare që prej 2013 e deri më sot :

 

Zonja dhe zotërinj,

 

Përshëndetje,

 

Së pari, ju e dini fare mirë dhe nuk keni aspak dyshim se unë e dua Shqipërinë [1] dhe se kam ardhur këtu me një vizion të ri [2] për të sjellur një politikë njerëzore [3]. Së bashku do ti japim politikës identitet dhe moral [4], elementë të cilët do të shërbejnë si për shtetin dhe qytetarët [5].

 

Së dyti dhe me të drejtë absolute, për ju që e ndërtuat Shqipërinë [6], unë e di që jeni të pakënaqur dhe të zemëruar prej partive të pushtetit 25 vjeçar [7], por bësomëni…bashkë do sjellim ndryshimin [8]. Jam këtu për tu kushtuar vëmendje qytetarëve [9]. Jam tepër i bindur se shqiptarët meritojnë më shumë [10]. Nuk i harroj gjithashtu brezat e rinj, dhe përfitoj nga rasti tu them atyre se Shqipëria është e të rinjve [11].

 

Së treti, zëri juaj [12] është i rëndësishëm, dhe nëse nuk votojmë, nuk flasim [13], kjo na bën që të mos kemi standarte jetese, dinjitet njerëzor [14]. Për këtë arsye, bashkombasit e mi, afrojuni vlerave se koha nuk pret [15], më dëgjoni është koha për njëri-tjetrin [16], se vetëm kështu mund të fitojmë të ardhmen [17]. Ju garantoj se të bashkuar jemi më të fortë [18].

 

Së katërti, është mëse e qartë që vendi ynë ka nevojë të rilindë [19] dhe të çohet në drejtimin e duhur [19], por kjo arrihet vetëm me punë dhe dinjitet [20].

 

Se pesti, si forcë politike me themele të patundura, ne ju afrojmë punësim, mirëqenie dhe integrim [21], e theksoj me plot bindje dhe po e ripërsëris, se do të ketë më shumë shërbim dhe punësim[22]. Duke më votuar, ke votuar për të ardhmen e fëmijëve tuaj, ke votuar për drejtësi, ke votuar për prosperitetin e vendit [23]. Portat e Bashkimit Europian po na hapen, dhe le tu tregojmë të gjithëve se shqiptarët janë vetëm europianë [24], dhe së shpejti do bëhemi pjesë e tyre.

 

Së gjashti, motra dhe vëllezër, ju bëj thirrje solemne të zgjidhni njeriun, t’ju qeverisë më mirë [25]. Duke më votuar, voto veten [26], voto vetveten [27], voto për komunitetin tënd [28] ku unë bëj pjesë.

 

Së shtatti dhe së fundmi, po ju them se me besimin në zot, pronë dhe komb [29] do ecim përpara [30] sepse ne jemi ndryshimi [30]. Rroftë Shqipëria, rroftë liria, rroftë demokracia, rroftë populli shqiptar !

 

Me këto slogane kaq inkurajuese është për tu çuditur kur dëgjojmë ende të flitet për ngerc ekonomik, për trazim social, dhe për papunësi në Shqipëri. « Besoj » se politikanët që bëjnë të tilla premtime, janë të vetëdijshëm dhe me « siguri » që do i mbajnë ato, të paktën ata që kanë fituar në zgjedhje. Në qoftë se premtimet e bëra nga politika shqiptare më sipër nuk mbahen, atëherë populli shqiptar me rrugë demokratike mund të reagojë dhe ta ndëshkojë atë me anë të votës në zgjedhjet e ardhshme parlamentare të 2017.

Burimi : Klara Buda Post (New York)

http://klarabudapost.com/shqiperia-e-sloganeve-politike/#.VioZZfnhDIU

 

 

Publikuar (Publié) në :

 

Kosova Plus :

http://kosovaplus.com/shqiperia-e-sloganeve-politike/

 

Dielli :

http://gazetadielli.com/shqiperia-e-sloganeve-politike/

 

Gazeta Ora :

http://gazetaora.com/shqiperia-e-sloganeve-politike/

 

Citynews.al :

http://www.citynews.al/2015/10/shqiperia-e-sloganeve-politike/

 

Shqipëria.com :

http://www.shqiperia.com/blog/shqiperia-e-sloganeve-politike/

 

 

REFERENCAT E SLOGANEVE :

 

[1] Partia Drejtësi, Integrim dhe Unitet (PDIU)

[2] Parti Forca Rinia (FRA)

[3] Aleanca për Demokraci dhe Solidaritet (ADS)

[4] Partia e Unitetit Kombëtar (PUK)

[5] Partia Fryma e Re Demokratike (FRD)

[6] Partia për Mbrojtjen e të Drejtave të Emigrantëve (PMDE)

[7] Partia Lëvizje për Drejtësi e Shqiptarëve (LDSH)

[8] Partia Ligj dhe Drejtësi (PLIDR)

[9] Partia Demokracia Sociale (PDS)

[10] Partia Republikane (PR)

[11] Lëvizja Socialiste për Integrim (LSI)

[12] Partia Lëvizje për Drejtësi e Shqiptarëve (LDSH)

[13] Partia Socialiste e Moderuar (PSM)

[14] Partia Personat me Aftësi të Kufizuara (PPAK)

[15] Partia Shqiptare Atdheu (PSHA)

[16] Partia Demokristiane e Shqipërisë (PDK)

[17] Partia Demokracia Sociale (PDS)

[18] Partia Aleanca Demokristiane e Shqipërisë (ADK)

[19] Partia Socialiste e Shqipërisë (PS)

[20] Partia Demokratike (PD)

[21] Partia Demokracia e Re Europiane (PDRE)

[22] Lëvizja Socialiste për Integrim (LSI)

[23] Partia e Bashkimit Mysliman të Shqipërisë (PDBMSH)

[24] Partia Bashkimi për të Drejtat e Njeriut (PBDNJ)

[25] Partia Bashkimi Demokrat (PBD)

[26] Aleanca Popullore (AP)

[27] Partia Lëvizja e Legalitetit (PLL)

[28] Partia Lëvizja për Zhvillimin Kombëtar (LZHK)

[29] Partia Republikane (PR)

[30] Partia Demokratike (PD)