Matjanëve (Cikel poetik)


Xhavit Gasa
Xhavit Gasa

-----------------------------------

EMRIN E ËNDËRRUAR

-----------------------------------

 

Udha ishte me ëngjëj kur thurja ëndrrat,

këmbët e vogla nxitonin mes gurëve në ferra

sytë vështronin pafajshëm yjet rreth hënës,

para ëndrrave të mia buzëqeshte pranvera!

 

Udha u mbush me djaj që s’e di nga erdhën,

gurët u rrokullisën ferrat gjembat i rritën,

këmbët e vogla vrarë nga gjembat e ferrës,

pikëloti në sy pikon për ëndrën e venitur!

 

Kur vitet po sjellin emrin e ëndërruar poet,

ditët më vijnë në këmbët lodhur e raskapitur,

lulet e vyshkura në vite kanë fillu me çelë,

pikëloti buzëqesh rikthehet pengu i ikur!

 

© Xhavit Gasa

 

 

-------------------

PETRALBË

-------------------

 

Gjeni kalin që kalëron me shekuj në shpinë

mos i kërkoni moshë vitet atë punë kanë,

dhe gurë mbi gurë ndiqni gjurmët e tij,

të gjitha gjurmët do t’ju çojnë në Petralbë!

 

Më madhështor se anija Kristofor Kolombit

ky kalë që më shkëmb gdhendi gjurmët,

mbi të kalëruan kreshnikët e kombit,

në shpirtin e gurëve shkrirë i kuq flamuri!

 

Ecni nëpër këta gurë mos lini të mbulohen,

kalin shekullor ndiqeni hap pas hapi,

me lule Arbërie gjurmët ja zbukuroni,

nuses mbi gurë mos ja prishni duvakun!

 

© Xhavit Gasa

 

---------------------------------------------

BUKUROSHET E PETRALBËS

---------------------------------------------

 

Nga kreshtat e larta që puthin qiellin e kaltër,

rrugës kalldrëmtë me gjurmë të historisë,

paskan zbritur në Klos bukuroshet e Petralbës,

kostumqendisurat me flamurin kuq e zi!

 

Gëzueshëm vallëzokan këto valët e Matit,

pasqyrë mbushur me ngjyra lule-lëndine,

në Klos kanë ardhur bukuroshet e arbrit,

kapur dorë për dore gjithë bukuroshet Ilire!

 

© Xhavit Gasa

 

 

------------------------------------------------------------

GERMAT E ABDURRAHMAN PËRMETIT

------------------------------------------------------------

 

Mbilleni ju Lisdanë një bredh të blertë,

se bredhat blerojnë në të gjitha stinët,

nëse nuk keni kërkojeni në themelet,

e Shën Trinisë ku është formula e pagëzimit!

 

Mbillni bredha pisha e rrënjë dafine,

të gjitha stinët të blerojnë hareshëm,

në degët e tyre të bilbilojë gjuha shqipe,

me germat që mbolli Adurrahman Përmeti!

 

© Xhavit Gasa

 

 

----------------------------------

HAPAT E GANI ALISË

----------------------------------

 

(Mjeshtër sporti)

 

Me gjatësinë e valës shkumbardhë të Matit,

me shpejtësinë e erës që nga malet zbriste,

shtat-larti sa Deja Gani Alia hidhte hapin,

në çdo pistë vrapimi stadiumeve i pari ishte!

 

Rrugëve të Zenishtit brezat ecën e do ecin,

se vitet nuk ndalen njeri tjetrin zevendësojnë,

gjurmët e rënda s’mbulohen ato gdhenden,

rrugëve të Zenishtit hapat e Gani Alisë vrapojnë!

 

 

© Xhavit Gasa

Blogu : Dars (Klos), Mat – Albania