Il Piccolo di Trieste (1925) / Intervista me Ceno bej Kryeziun, Ministrin e Jashtëm të Shqipërisë, mbi situatën e brendshme të vendit të tij

Nga Aurenc Bebja*, Francë – 10 Mars 2024

“Il Piccolo di Trieste” ka botuar, me 7 gusht 1925, në faqen n°2, intervistën ekskluzive të Ceno bej Kryeziut mbi situatën e brendshme asokohe në Shqipëri, të cilën, Aurenc Bebja, nëpërmjet blogut të tij “Dars (Klos), Mat – Albania”, e ka sjellë për publikun shqiptar :

Kushtet e brendshme të Shqipërisë

Një intervistë me ministrin Ceno Beu

Zagreb, 6 gusht.

“Obzor-i” merr nga Sushaku (Sušak, Rijeka) : Gjatë kalimit të tij në Sushak, Ministri i Jashtëm shqiptar, Ceno bej Kryeziu, u intervistua nga disa gazetarë që donin të mësonin për kushtet e brendshme të Shqipërisë. I intervistuari tha se në Shqipëri mbretëron rendi më i përsosur, ndaj të gjitha lajmet e shtypit të huaj për trazira dhe çrregullsi nuk kanë asnjë bazë. Kushtet ekonomike gjithashtu janë përmirësuar shumë.

Qeveria shqiptare i dha “Anglo-Persian Oil Company” shfrytëzimin e burimeve të naftës në Shqipërinë e Jugut dhe në të njëjtën kohë kontraktoi me Italinë një burim më të vogël, jo shumë larg Vlorës. Muajin e kaluar u themelua Banka Kombëtare me një kapital prej 50 milionë frangash ari. Marrëdhëniet politike me shtetet fqinje janë të shkëlqyera. Me Jugosllavinë, Shqipëria mban marrëdhënie të mira miqësore. Mosmarrëveshjet në lidhje me rregullimin e kufijve, të cilat për një kohë të gjatë nuk kanë mundur të konsolidojnë marrëdhëniet e fqinjësisë së mirë ndërmjet Shqipërisë dhe Mbretërisë së Serbëve, Kroatëve dhe Sllovenëve, së shpejti do të zgjidhen në kënaqësinë e të dyja palëve. Në këtë drejtim, Dhoma i ka dhënë liri të gjerë veprimi Qeverisë në mënyrë që ajo të përfundojë negociatat për përcaktimin përfundimtar të kufijve të Vermoshit dhe Shën Naumit në liqenin e Ohrit. Për këtë qëllim, delegati i Qeverisë së Tiranës, z. Mehdi Frashëri ndodhet në Beograd dhe është përgjegjës për përfundimin e negociatave.

Shqipëria — përfundoi Ceno Beu — ka marrëdhënie të shkëlqyera me Italinë dhe jam i lumtur të mësoj se mosmarrëveshjet e vogla mes Jugosllavisë dhe Italisë janë zgjidhur plotësisht.

Ceno Beu i shoqëruar nga sekretari i tij u nis për në Beograd. Vizita e tij në kryeqytetin e Jugosllavisë nuk ka karakter politik, aq sa ai shkon në një kohë kur mungojnë shumë ministra jugosllavë. Ceno Beu është ende i ri; është njeri i kulturuar që duket më shumë parizien se sa shqiptar. Ai është kunati i Presidentit të Republikës së Shqipërisë, Ahmed bej Zogu, sepse ëshë martuar me një nga motrat e tij.

* Çdo gazetë online apo print, çdo portal që merr këtë shkrim duhet të citojë autorin në fillim (Nga Aurenc Bebja, Francë) dhe burimin e informacionit në fund (Blogu © Dars (Klos), Mat – Albania), si dhe të vendosë linkun e burimit : https://www.darsiani.com/la-gazette/il-piccolo-di-trieste-1925-intervista-me-ceno-bej-kryeziun-ministrin-e-jashtem-te-shqiperise-mbi-situaten-e-brendshme-te-vendit-te-tij/. Në rast të kundërt mos e publiko.

Publikuar në :

https://www.voal.ch/il-piccolo-di-trieste-1925-intervista-me-ceno-bej-kryeziun-ministrin-e-jashtem-te-shqiperise-mbi-situaten-e-brendshme-te-vendit-te-tij/multimedia/dossier/

https://www.drini.us/il-piccolo-di-trieste-1925-intervista-me-ceno-bej-kryeziun-ministrin-e-jashtem-te-shqiperise-mbi-situaten-e-brendshme-te-vendit-te-tij/

https://diasporashqiptare.al/2024/03/10/83517/

https://alb-spirit.com/2024/03/10/il-piccolo-di-trieste-1925-intervista-ceno-bej-kryeziun/

https://ampress.ca/1925-intervista-me-ceno-bej-kryeziun-ministrin-e-jashtem-te-shqiperise-mbi-situaten-e-brendshme-te-vendit/