Poezi me rastin e konkursit letrar “Malli I Kosovës”


© Fatmir Neli
© Fatmir Neli

-----------------------------------------

SHQIPONJA ME DY KRERË

-----------------------------------------

 

Tek i kuqi bajrak me valë

dëgjova një bisedë të rrallë.

 

Njëra kokë e shqiponjës

po na i thoshte së motrës:

 

-Kur unë jam në luftë e punë,

Ti, a thua na fle gjumë?!

 

Ati ynë, Skënderbeu,

kot s’na bëri dy te kreu.

 

Të ruajmë dhenë nga hasmëri,

Ti në Jug, unë në Veri.

 

Me dy na bëri Skënderbaba,

të kemi sy para e prapa.

 

Ama na la me një zemër tok,

që na bie një gjak në kokë.

 

Zgjohu motër, shih me sy,

po na kafshon hasmi i zi!

 

Mori motër, mblidhi mendt’

mos të bëhesh rudiment!

 

 

 

--------------------------------

SHTËPIZË E VJETËR

--------------------------------

 

Mbi një kodër, në një lëndinë,

Mes dy lumenjve të kulluar,

unë aty kisha shtëpinë,

fort për të jam përvëluar.

 

Kam dhimbje, kam mallë,

Tek e kujtoj nga qyteti,

druhem mos strehëzën e rrallë

do ta shembë një ditë tërmeti.

 

Shtëpi e vjetër, kullë me breza,

Me ato dritare si frëngji,

Qëndron e heshtur ndër të tjera,

Mbyllur brenda një histori.

 

Dhe nëse kërkon ta çelësh

S’të lënë dot merimangat,

Për dallëndyshet çoj haberet

Mos të t’i thyejnë llampat.

 

Tym vërtetë s’ngre mbi oxhak,

por themelet i ke në rrasë,

rrahur nga era, e lodhur, plakë,

ngrys një ditë e ngrys një natë.

 

Ndonjëherë s’është çudi

Të iki nga ky ibret qytet,

Shtëpizë e vjetër si me magji

Nën strehëz të saj më thërret.

 

 

 

--------------------------

BUZËMBRËMJE

--------------------------

 

Theu brinjët dielli

mbi kurrizin e një zhabe,

uli kokën lulja nga turpi,

varur në një lis

dy sy kukuvajke,

bëhen njësh dy buzë

pas një plepi,

afrohen ca kërthia

pranë një vatre,

karkaleci dirigjon

një orkestër nate.

 

 

 

------------------

MEDITIM

------------------

 

Një këpucë lustrafinë

Pashë në buzë të detit,

Por s’po dëgjoja borinë

E ushtrisë së mbretit…

 

Hirushja e ditëve tona

Mbytur të jetë vallë,

Apo…për te “semafori”

Këmbëzbathur ka dalë?...

 

 

 

------------------------------------

NË PREHËRIN E NËNËS

------------------------------------

 

S’e kam zili peshkun

              në djepin e valës,

S’e kam zili vellon

              në krye të zanës,

S’e kam zili këngën

              në buzë të bilbilit,

S’e kam zili diellin

              në sytë e mëngjesit,

S’e kam zili yllin

              kur rri pranë hënës,

Gjersa kokën kam

              në prehërin e nënës.

 

 

 

--------------------

FJONGOJA

--------------------

 

Me gjethen e vjeshtës

                           kacafytej

Fjongoja e një studenteje,

A thua një lidhje hibride

                           po mbytej,

Apo ishte në endje!...

 

 

 

© Fatmir Neli  

Blogu : Dars (Klos), Mat - Albania