Një cikël i ri fabulash nga poeti matjan Fatmir Gjestila



--------------------------------------

VJERSHA NË FACEBOOK

--------------------------------------

 

Grerëza mendjelehtë,

gëz e gëz plot naze,

i thotë zonjës Bletë:

- Më vodhe ca vargje!

 

Bleta plot pekule,

mendjen hiç s’e humb:

- Unë shkruaj mbi lule,

ti shkruan mbi thumb.

 

Vargjeve s’u vë roje,

flasin drejt e qartë;

çdokush që thur hoje,

s’bën patjetër mjaltë…

 

 

---------------------------------

PËRGJIGJET PËRROI

---------------------------------

 

Gjithë verën i merrej përroit zhavori

e kthehej në llum e hurdha i gjori,

po hiq nuk e vriste mendjen ai,

jermthi  shkonte drejt lumit të tij.

 

Teksa zhavori i atij të ngratit

hidhej gropave të udhës së fshatit,

shelgjet një ditë iu kthyen në kor:

"Po pse nuk e ngre zërin, more i gjorë?"

 

"E përse duhet vallë ta bëj këtë punë?

Në dimër i gjithi do të kthehet te unë..."

 

 

-------------------

AKUARIUM

-------------------

 

Akuariumi ngre furtunë:
- Ti fajtor, të drejtë kam unë!


Avokatja, zonja Ngjalë,
Prokur Mlyshin lë pa fjalë.


Krap Gjykatësi lart ngre valën:
- I pandehuri të thotë fjalën!

 

I pandehuri, Peshkaqen,
gojën hap e fjalë nuk gjen.

Fjalë nuk gjen, po bishtin tund:
akuariumin pi me fund!

  

 

------------------------

DY VËLLEZËR

------------------------

 

Dolën me hënë dy vëllezër dikur

kërkuan gjithandej shkurre, luadh e gur,

po nuk e gjetën dot lopën e vetme:

qumështore mjaft, por idhnake e serte.

 

Ofshani njëri vëlla e tha me të qarë:

Ah, sikur ta kishim patur Larën gomar!

Ç'thua? - tha tjetri. - Mos ke lajthitur?

Të kishte qenë gomar, tashmë kishte pëllitur!

 

 

 

-----------------------

KUKUDHËT

-----------------------

 

Ndërruan kotruvet te burimi 
e njëri-tjetrin mbërthyen për fyti;
njëri thoshte “ujë yt ka erë” 
tjetri “mbeturina ka i yti.”

 

Burimi qeshte tek merrte udhët 
të ujiste arat dhe pemët: 
- Sa shpejt harrojnë kukudhët 
e s’kujtohet të lajnë as enët...

 

 

 

-----------------------------------

GOMARI I XHA LIKES

-----------------------------------

 

Klith xha Likja mbi gomar:

Prij karvanin! Jam i parë!

 

Diku Ujku pas i hidhet,

nis e shqyen gjithkund vithet.

Dhe të tjerë s’e mbajnë gazin,

xha Likes i thërrasin:

 

O xha Like, vrapin ule,

po të zgrap Ujku në tule!

 

Likja prapë s’i zbret samarit:

S’janë të miat, janë të  gomarit

 

 

 

----------------------------

LEJE NDËRTIMI

----------------------------

 

Thith çibukun nëpër tym 
e pastaj thotë gjyshi Lym: 
- Të pyeta nipçe, por s’më the, 
përse qyqja s’ngre fole?

Qesh e zërin lart ngre Gimi: 
- Se nuk ka leje ndërtimi…

 

 

 

-------------------

PËRGJIGJE

-------------------

 

Kthehet Gjeli... Po, për besë!
Lafshakuq, gjithë finesë.

Data një... Zërin bori:
"Gëzuar, miq, Vitin e Ri!"

 

"Si kështu?!"e pyet një tjetër
"Nuk të mori Vit' i Vjetër?"

"S'e arrita dot, or mik!
Mbeta pezull në trafik!"

 

 

----------

ESE

----------

 

Çak Çakalli gazetar
heton Ujkun gjakatar
porse Ujku e njeh lojën;
hedh një kockë e i mbyll gojën.

 

Çak Çakalli humb guximin,
harron shpejt investigimin,
me çak-çak e merr prroskën;
shkruan një ese për kockën.

 

 

----------------------------------------------------

LAFSHËKUQI NDËRRON NGJYRË

----------------------------------------------------

 

Për para e për pushtet
bëhet Gjeli deputet…
Por, dikur, si i paftyrë,
lafshëkuqi ndërroi ngjyrë.

 

Pula plakë, pulë e urtë,
i tha Gjelit, me të butë:
- Po u hodhe kunj më kunj,
dikur kunjat bëhen hunj!

 

Ia pret Gjeli: - Ti, e mjera…
Fjalë e besë i mori era…
Prit e prit të dolën brirë;
lart, mbi hunj këndohet mirë.

 

 

-----------------

AVOKATI

-----------------

 

Në mbretërinë e pyllit

bëhet mbledhje radhe...

Për ligjet dhe gjykatësit

po flet nje sorkadhe.

 

E dëgjon e flet luani:

- Mos u lodh kaq shumë...

Gjykatat, gjygjet, ligjet

i bëj vetëm unë!

 

Pyetjen hedh një zebër:

- Avokat, kush qenka?!

Qesh e ngjesh një dhelpër:

- Janë këmbët e shpejta! 

-------------

BUÇJA

-------------

 

Bën fushatë nëpër qytet;

qentë rreth saj plot njëzetë.

 

I thotë shoqja: - Ty të lumtë,

truprojat  ke të shumtë.

 

- Ç’truproja,  moj firaune;

mbajnë radhë për një vend pune!

 

 

-----------------

GAZETAT

-----------------

 

Viç larania, këmbëshpejta,

shkon e blen një deng gazeta.

 

Pas një ore, shtrirë te parku:

- Oh, moj nëne, më dhemb barku!

 

- Si kështu?! – habitet lopa. -

Nga gazetat të dhemb koka!

 

- Po, moj nëne, por harrova,

Unë i hëngra, s’i lexova!

 

 

-----------------

GJI ZANE

-----------------

 

Ec e ec e dita zbardh

e gjen ZANËN në livadh.

– Ej, oj ZANË, e lumjanatë,

më jep pak nga gji i majtë.

 

- Trim, o trim, më është tharë,

ma kan pi ca pusht-tetnarë.

 

– Më jep, pra, nga i djathti,

gjersa t’njomet prap’ i majti…

 

- Jam tharë, trim, në të gjitha anët,

krejt m’i pinë politikanët…

 

- Mori ZANË, ti çfarë po thua

lute motrën të më jap mua…

 

- Paj… dhe motra ka të vetët,

e kanë mjelë krejt deputetët.

 

 

--------------------

I PAVARUR

--------------------

 

- Kjo lojë është e pistë…

Unë të mos jem në listë?!

 

Kacadreni më nuk fal:

- I pavarur do të dal!

 

Pyet gjinkalla, me të tallur:

- Gjer tani, ku ishe varur?

 

 

--------------

LEPUR

--------------

 

Ujku ndizet, thërret fort:

- Kush s’ma jep votën sot

nesër pyllin s’e kullot!

 

Pshurret lepuri, tmerr në sy:

- Si t’ia bëjmë po s’fitoi ky?

 

- S’fitoi ky? Një tjetër vjen

prapëseprapë lepur të gjen.

 

 

-------------------------------------

MJELMA MITINGASHE

-------------------------------------

 

Mësuese Mjelma mitingashe,

ngjyer, lyer buzë e faqe.

 

- Pa shiko, more bilbil

dhe fustanin krejt jeshil!

 

- E ndërroi te Pyll’ i Vjetër,

se fitoi Parti’ e Gjelbër!

 

 

--------------------

VETËPIRJE

--------------------

 

Para tij, Bardhokja dhi

lakon qafën sisët pi.

Bariu Cane sytë naaa!

- Ç’është kështu kjo hata?

Tyt, Bardho! Si qeveritë:

i ushqejmë, vetëpijnë gjinjtë!

 

 

----------------------------

NJË, DY, TRE…

----------------------------

 

Ujku vrasës, natë e ditë,

mban fjalim për pularitë:

- Kujdes dhelprën, hapni sytë,

si ajo nuk ka të dytë!

 

Brit çakalli, me të qarë:

- Ajo e dytë e ti i parë;

unë i tretë, vij pas jush,

therni ju, unë thesin mbush.

 

 

---------------------

ZGJEDHJE

---------------------

 

Fushtë zgjedhjesh....Ç’gëzim e këngë!

Përvesh kanguri buzë edhe mëngë.

 

Lepujt veshët, bigë, përpjetë:

- Ky, or mik vjen me kuletë!

 

Ia pret dhelpra:- Ç’fat, për besë!

Nën bark paska edhe një thes.

 

Qesh iriqi, nën gëmushë:

- S’vjen ta zbrazë, vjen që ta mbushë!

 

 

------------------

KUPON

------------------

 

Keni parë a s’keni parë,

një ujk hedh qengjin në shpinë;

rend e rend si i shkarë:

i gjithë pylli tjerr çudinë.

 

Fjalën thumb zonja e vjetër:

- Sa e bleve, kumbarziu?

- Nuk pagova hiç, moj dhelpër,

se s’më dha kupon bariu!

 

 

-------------

LIRIA

-------------

 

Breshku Kuk, një ditë me erë
e la zhguallin në një ferrë
edhe klithi: “Oh, sa mirë…
gjeth, i lehtë dhe krejt i lirë!”

 

Ec e hidhu shteg më shteg
poqi dhelprën në një breg.
U mblodh kruspull, si çdo herë
porse zhgualli qe në ferrë.

 

 

© Fatmir Gjestila

Blogu : Dars (Klos), Mat - Albania