Le Phare de la Loire (1898) / Kur studiuesi francez Leon Cahun u kërkonte bashkëkombasve të tij të mos harronin fjalët e popullit shqiptar në manifestin e 1 janarit 1898 që sapo kishte përkthyer


Léon Cahun
Léon Cahun

Nga Aurenc Bebja*, Francë – 19 Prill 2020

 

“Le Phare de la Loire” ka botuar, të mërkurën e 19 janarit 1898, në ballinë, manifestin e popullit shqiptar të 1 janarit 1898, të përkthyer asokohe nga studiuesi, gazetari dhe shkrimtari francez Léon Cahun, të cilin Aurenc Bebja, nëpërmjet Blogut “Dars (Klos), Mat – Albania”, e ka sjellë për publikun shqiptar :

 

Buletini ditor

 

Burimi : gallica.bnf.fr / Bibliothèque nationale de France
Burimi : gallica.bnf.fr / Bibliothèque nationale de France

Paris, 18 janar.

 

Manifesti i parë i popullit shqiptar, i gatshëm për të marrë armët, sapo është botuar; e kisha për detyrë ta bëj të njohur në Francë, përtej lidhjes personale të miqësisë dhe respektit që kam ndaj kombit “Chkipe”; përtej miqve të mi Qemal Beut, Besim Omerit dhe Frank Spiro begut (Faik Konicës), edhe sikur popullin shqiptar ta zbuloja për herë të parë, unë do të duhej t’a publikoja deklaratën me të cilën ai pohon autonominë dhe vullnetin e tij; këtë gjë e kam për detyrë si francez, si republikan, si ushtar i vjetër në betejën për liri, për drejtësi, për njerëzim, në të cilën luftoi, këtu dhe atje, për gati dyzet vjet.

 

Manifesti është i datës 1 janar, dhe i drejtohet të gjithëve :

 

Në emër të popullit shqiptar, të Lidhjes së Prizrenit, të lidhjeve dhe komiteteve të tjera të formuara në tokat e Chkipérie (Shqipërisë) për mbrojtjen e atdheut; Shoqëria Kombëtare Shqiptare në Itali, Shoqëria Shqiptare “Dituria” në Bukuresht; Komiteti Shqiptar në Kostandinopojë, “Vëllazëria” shqiptare në Egjipt, dhe Shoqëria “Deshire” në Sofje; u bën apel shqiptarëve nga Italia, Greqia, Egjipti, Bullgaria, Serbia, Rumania dhe Dalmacia. Popujve fqinjë, ai (populli shqiptar) u ofron një paqe besnike dhe një miqësi të sinqertë, nëse heqin dorë nga pretendimet e padurueshme “nëse grekët, bullgarët, serbët, malazezët deklarojnë veten si vëllezërit tanë, ata do të jenë të mirëpritur; ne, si të tillë, do t’i pranojmë. Pra, secili le të qëndrojë zot në shtëpinë e tij. Ne nuk kemi pretendime në territoret e tyre; Ne duam Shqipërinë për Shqiptarët.

 

Fuqive, populli shqiptar u kërkon vetëm respekt për të drejtën ndërkombëtare, pra asnjanësinë. Për herë të parë, në Lindje, një komb flet me vetëdije të plotë për veten, për të drejtën e tij, për nderin e tij, për burrërinë e tij; Kërkoj nga lexuesit francezë të mos harrojnë këto fjalë të forta të popullit shqiptar :

 

Ne nuk ngremë zërin për të bërë kërcënime arrogante; ne nuk kërkojmë gjithashtu nga të huajt që të kenë mëshirë ndaj racës sonë. Ne i bëjmë thirrje nderit dhe besnikërisë së fuqive; që ato të respektojnë ndaj Shqipërisë parimin e mosndërhyrjes, bazën e së drejtës ndërkombëtare, garantimin e evolucionit progresiv të popujve.

 

E thjeshtë dhe e qartë është kërkesa e shqiptarëve, të cilën ata janë të gatshëm ta mbështesin me armë :

 

Të gjithë, për sa kohë që jemi, pavarësisht bindjeve tona fetare, të gjithë njëzëri dhe në marrëveshje, i kërkojmë Shkëlqesisë së Tij Sulltan Abdyl Hamid Khan II autonominë administrative në tokat e Shqipërisë.

 

Nga autonomia administrative e Shqipërisë do të lindë revolucioni i madh i cili do t’u japë forcë dhe jetë popujve të Lindjes, të rraskapitur, anemikë, të mërzitur, të shpërndarë jashtë vendit nga urrejtja fetare; dhe pikërisht në emër të fesë, ky komb fisnik shqiptar, këta myslimanë, këta katolikë, më në fund denoncojnë padrejtësinë e shkuar, nga e cila Lindja po vdiste, nëse, në fund të fundit, ata nuk do të ishin ngritur, të fortë me besimin e tyre në vetvete !

 

Shkëlqesia e Tij Sulltani do të duhet t’i dëgjojë këto dëshira të drejta të një populli të tërë dhe do të duhet t’i plotësojë ato sepse Kurani ia imponon atij. Për herë të parë, ai nuk do të dëshirojë të rebelohet kundër ligjit suprem të atyre që besojnë në profet.

 

Në të njëjtën mënyrë, dhe me të njëjtin besim, ne i bëjmë thirrje famulltarit të Jezu Krishtit në tokë, hierarkit sovran të Fesë së Krishterë në Romë; i kujtojmë atij respektimin e Ligjit hyjnor, që farisenjtë (Pharisiens), varret e zbardhura nën rrobat e ministrave të Ungjillit, shfrytëzojnë për armiqtë ndaj fisnikëve; duke nxitur mosmarrëveshje dhe përçarje midis të krishterëve dhe myslimanëve, ata sjellin vetëm gjakderdhje.

 

Sepse Ungjilli, ashtu si Kurani, është ligji më i lartë i dashurisë dhe vëllazërimit dhe nuk mund të lejojë që të vazhdojë urrejtja midis vëllezërve dhe vëllezërve.

 

Kjo është fjala e kombit shqiptar; Jam i lumtur që e përktheva atë dhe ua bëra të njohur francezëve. Pas një nate kaq të gjatë, dita më në fund po zbardh, në Lindjen e Evropës: Ex Oriente Lux.

 

Léon CAHUN

(Léon Cahun, i lindur me 23 qershor 1841 në Haguenau (Bas-Rhin) dhe vdiq më 30 Mars 1900 në Paris, ishte një shkrimtar, gazetar, specialist në çështjet e Lindjes dhe studiues francez, autor i romaneve aventureske.)

 

 

* Çdo gazetë online apo print, çdo portal që merr këtë shkrim duhet të citojë autorin në fillim të shkrimit (Nga Aurenc Bebja, Francë) dhe burimin e informacionit në fund (Blogu © Dars (Klos), Mat – Albania), si dhe të vendosë linkun e burimit : https://www.darsiani.com/la-gazette/le-phare-de-la-loire-1898-kur-studiuesi-francez-leon-cahun-u-kerkonte-bashkekombasve-te-tij-te-mos-harronin-fjalet-e-popullit-shqiptar-ne-manifestin-e-1-janarit-1898-qe-sapo-kishte-perkthyer/. Në rast të kundërt mos e publiko.

 

 

Publikuar në :

 

https://americaneye.al/manifesti-i-1898-kur-studiuesi-francez-leon-cahun-u-kerkonte-bashkekombesve-te-tij-te-mos-harronin-fjalen-e-popullit-shqiptar/

 

https://www.kultplus.com/lajme/kur-studiuesi-francez-u-kerkonte-bashkekombasve-te-mos-harronin-fjalet-e-popullit-shqiptar/

 

http://illyriapress.com/le-phare-de-la-loire-1898-kur-studiuesi-francez-leon-cahun-u-kerkonte-bashkekombasve-te-tij-te-mos-harronin-fjalet-e-popullit-shqiptar-ne-manifestin-e-1-janarit-1898-qe-sapo-kishte-perkthyer/

 

https://www.balkanweb.com/kur-studiuesi-francez-leon-cahun-u-kerkonte-bashkekombasve-te-tij-te-mos-harronin-fjalet-e-popullit-shqiptar-ne-manifestin-e-1-janarit-1898-qe-sapo-kishte-perkthyer/

 

https://tirananews.al/viti-1898-manifesti-shqiptar-shetiti-boten-studiuesi-francez-mos-i-harroni-fjalet-e-popullit-shqiptar/

 

https://opinion.al/studiuesi-i-kerkon-popullit-francez-te-mos-harrojne-thirrjet-e-shqiptareve/

 

https://kohajone.com/studiuesi-i-kerkon-popullit-francez-te-mos-harrojne-thirrjet-e-shqiptareve/

 

https://dosja.al/leon-cahun-studiuesi-francez-qe-u-kerkonte-bashkekombasve-te-tij-te-mos-harronin-fjalet-e-popullit-shqiptar-ne-manifestin-e-1-janarit-1898-qe-sapo-kishte-perkthyer/

 

https://konica.al/2020/04/studiuesi-francez-fjala-e-kombit-shqiptar/

 

https://www.mekulipress.com/kur-studiuesi-francez-u-kerkonte-bashkekombasve-te-mos-harronin-fjalet-e-popullit-shqiptar/